الخدر العاطفي / تبدد الشخصية

الاكتئاب لفترة طويلة ، الضغط النفسي العالي ، تراكمات مشاعر ما تم معالجتها ، الالم المستمر ٫العجز عن إيجاد حلول لمشاكلي وللاسف ما قدرت اطلع من دوامة الافكار لمدة طويلة

فشلت باني اطلع نفسي من المأزق اللي انحطيت فيه ، ولمن تفشل عقلك راح يبدي يشتغل بشكل تلقائي خارج ارادتك.

استمرار وقوع المشاكل فوق رأسك لفترة طويلة وتجاهلك لهذه المشاعر وعجزك عن السيطرة عليها راح يكون اول مسبب للخدر العاطفي ، لازم تفهم ان الخدر مو مشكلة نفس الاكتئاب او مثل اي مرض نفسي بل هو مجموع المشاكل + استمرارها لفترة طويلة جداً جداً

المرحلة الاولى " ضباب ثقيل"  

 استمرارك بعدم شرح نفسك لنفسك راح يوصلك لهذه المرحلة تجاهل المشاعر بس حتى ما تزيد من اكتئابك راح يزيد من الامر سوءاً وحتى لو حاولت تحلل الوضع هم راح تزداد سوء، عقلك تلقائياً يعرف ان ماكو حل ثاني غير انه يوقف شغله 

الوعي الزايد بنفسك بشكل سلبي ماراح يولد غير الحزن، 

بشكل غريب جداً عقلك واعي لهذه الأمور فراح يبدي يفصلك عن نفسك ، الاحداث اللي راح تصير وياك ما راح فعلاً تكون متواجد فيها بكل بساطة انت ما راح تحس بارتباط مع هذه الاحداث 

نظرتك لنفسك راح تصير كأنك شاهد على حياتك مو عايشها فعلاً 

حرفياً كأنك طرف ثالث هنا..

المرحلة الثانية " صحراء قاحلة" 

 يستمر هدف العقل بتجريدك من مشاعرك بس حتى لا تحزن،

هنا راح تنسى هواي احاسيس كانت عندك وراح يخف عندك ردات فعلك تجاه الاشياء سواءاً السعيدة او الحزينة اصلاً مرات السعادة راح تنفر من يمها لانها دخيلة عليك والاشياء الحزينة راح تمثلك وراح تحس بالانتماء الها ، كل شي واضح جداً وحاد

المشكلة هنا راح تبدي توضح اكثر صح انت هنا مكتئب ومضغوط  بس الشيء السيء انك ما تحس بأنك حزين وكأنما تعودت على هذا الحال..

الحقيقية انك ما تعودت  بس هذه وسيلة دفاع يخلقها الانسان بس حتى يتعايش وي الوضع يبدي يطفي كل شيء ويتجاهل كل شيء يحس بيه ، الشيء الواضح هنا انك راح تلتفت الى حقيقة انعدام ردة فعلك تجاه الأحداث اللي تمر بيها..

المرحلة الثالثة " شتاء بارد وهدوء موحش "

هاهي انتَ استوعبت مشكلتك الجديدة وراح تحس بهذا الهدوء موحش وراح تحس بهذا الوجود القاتل كل شيء يصير بطيء قدامك راح تتمنى وقتها لو تصير حجر او مزهرية مالك وجود ولا حمل عليك وهنا راح تبدي كثرة الخيالات والتمني.

هنا راح تكثر عندك احلام اليقظة ، احلام تمشي على مزاجك وعلى مزاجك بس ، كل شيء تحتاجه بيها ، اصدقاء ؟ موجودين 

امنياتك اللي ما حققتها ؟ هم موجودة 

التقدير اللي تستحقه هم موجود 

أحلام اليقظة قد تستمر لساعات وانت بس تنسج بنسيجها وتحيك باحداثها وراح تكون هي المدخل لاخطر مافي الخدر ، 

لو نتأمل شوية راح نشوف المراحل كلها هذه هي هدفها نبيل بالنهاية هي بس تريد تخلصك من الدوائر اللي انحطيت فيها

طبعاً تبلد المشاعر هذا لازم يكون مسبوق بفترات ضغط طويلة قبله ، الهدف اعتقد من هذه المراحل هو فصلك عن واقعك 

المرحلة الاولى "تنفصل عن مشاعرك"

المرحلة الثانية "تنفصل عن ردات فعلك "

المرحلة الثالثة "تنفصل عن واقعك " 

واضح جداً شنو الهدف من هذا السلوك ، هو الهرب من الواقع 

وكل ما تقدمت بالمراحل راح يتعمق نوع الهروب وراح تخسر جزء من ماهيتك بكل خطوة ، وشوية شوية يتدرج بالانفصال..

بس كل هذه الاحداث هي لا شيء قدام الرعب الموجود قدامنا

المرحلة الرابعة " سماء عالية " 

هذه حالة فتاكة لربما اسوء شعور شعرت بيه بحياتي ، 

هنا راح تبدي تشوف جسدك بس ماراح تحس بيه انه انتَ ،

هنا راح يبدي انفصال ماهيتك عن جسدك..

سوء الحياة وعدم الاحساس بالانتماء لاي شيء وكرهك للمعيشة اللي عايشها راح يوصلك لهذه النقطة ،

تتمنى لو بس تكدر تحس باي شيء مرة ثانية ،

ممكن تبدي تتروش بمياه باردة بس حتى تحس بالاتصال بجسدك مرة ثانية اووو

بعض الاحيان وفي بعض الحالات احتمال تجرح نفسك بس حتى تحس باي شيء (الحمدلله ما وصلت لهذا الفعل ) 

او ممكن وهذا الشيء الاخطر على الاطلاق بكل هذه المعادلة 

انك تجيك افكار انتحارية لان لمن تدخل بالمرحلة الرابعة وانتَ خلاص نفصلت بشكل كامل تقريبأ عن واقعك راح تبدي الافكار تتسائل 

اذا هو مو جسمي ولا هذه مشاعري هل راح يفرق اذا قدمتها للموت ؟

 ارجع اكول الخدر العاطفي مو مشكلة بحد ذاتها بل هي مجموع مشاكل ثانية وهو بس جسمك ونفسيتك تصرخ وتقول لك تعبت تعبت جداً.

طبعاً هذا الانفصال ماراح يصير بيوم وليلة طبعاً يحتاج ان هذه المشاكل تستمر وياك لفترة طويلة بالنسبة لي كانت سنتين كعدت بنفس المشاكل سنتنين الا ان اجاني الخدر هذا ،

عاد يعني كلامي غير علمي البتة ولا متحقق من اي شيء 

هو بس تجربتي ورايي بالمواضوع 

وان شاء الله ما تشوفون اي شر يا رب 🙏