مثالب المراهقة

بداية عمر الانسان الفعلية ، اول بصيص لفكر الشخص ووعيه وبداية تكوينه لاراءه ، اول خطة للتغيير تجي بباله ،  اول مشروع يحب ينفذه ، اول احكام يبدي يطلقها،  بداية بناء ثقته بنفسه ، محاولة الشخص بالخروج عن السائد ومحاولته لعيش حياته بما يناسب معتقده..

لو نشوف نية الشخص اللي جاي يمر بمرحلة مراهقته فما اعتقد اي واحد راح يمر بمشاعر اصدق من ما هي بهذه المرحلة بس للاسف جميع اللي قلته راح يقابله عملية قمع شديدة جداً من اقرب الناس - الاهل -  استعمال ابشع الاعذار والاسباب من اقرب الناس بس حتى تتجرد من ذاتك اللي توك بديت تتعرف عليها ، أثر هذا الشيء على الشخص مهول الى ابعد درجة وما راح يولد غير العناد بغض النظر عن اذا كانت افكار الشخص صحيحة او منحرفة من حقه يعاند الاسكات الحاد اللي انفرض عليه حتى لو شخص اجاك بفكرة مو صحيحة مو من حقك تسكته وبس،  ما يصير تساومه بفضائلك عليه مو صح على الام تساوم  برضاتها ولا صح على الاب يساوم بتعبه ، شعلة الشباب اللي راح تجي بهذه الفترة ماراح تتعوض مرة ثانية ومع ذلك كل اللي حواليك راح يلوح بيديه في سبيل اخماد هذه الشعلة... 

هسه هو صح بالعادة المراهقين اعصابهم تالفة وما عندهم ذرة صبر بس هذا مو يعني ان افعالهم مو مبررة ، اللوم الزايد عليهم ونظرات العتب والوحدة اللي يمرون بيها كلها وقود للعصبية اللي عندهم ، وما يصير ان يتم تجاهل مشاعرهم او تهميشهم بحجة

    " جاي يمرون بفترة مراهقة ، فترة ويصحى "

هذه الجملة بالذات راح تزيد من الطين بلا  ، ما اشوف ان المفروض حمل هذه المرحلة يقع على عاتق المراهق بل العكس لو الناس تعاملت بهذه الفترة على انها اختبار لمرونة تعامل الاهل جان الوضع صار احسن ، لو بس الناس تنازلوا شوية عن فرض سيطرتهم وحاولوا يناقشون ويتكلمون مو بصيغة اني جاي املي عليك اللي تسويه بل بصورة اني اريد اسمعك جان الوضع هم جان تحسن ، للاسف اهالينا متعلمين على نظام شبه عسكري بالتربية مو من حقك تتكلم عن مشاعرك ومو من حقك تغير المنظومة اللي ماشيين عليها من اجيال واجيال سابقة ،

بالنسبة الي اصنف المراهق صنفين بهذه الفترة والامر اشبه بمفترق طرق

الصنف الاول :

 هم اللي يتعبون من كثر الجدال وخطر الاصتدام ، عدم الإستقرار اللي حاصل افقدهم طاقتهم ، لذلك يقروون بشكل تلقائي او غير تلقائي ان يتخلون عن معتقداهم وينجرون ورا المعتقدات 

الموضوعة من الغير قاتلين بهذه الخطوة كل أمل بابداع جان عندهم ، يمكن لهذا السبب نشوف ناس بكل مكان متشابهين بالافكار بالاقاويل كأنهم نسخ من بعض ، لا شيء يميزهم ولا روح للتجديد عندهم ، انطفوأ مرة واحدة وإلى الابد....

الصنف الثاني : 

هم الناس اللي قرروا يتخلون عن علاقتهم باللي سكوتهم حتى لو كانوا اقرب الناس الهم ، ومو شرط اقصد بالتخلي الهجر ، عادي يكون تقليل الكلام او ابتعاد لفترة او عدم الاكتراث باراء الاخرين، واللي يسوي هيج من وجهة نظري يستحق يتسمى انسان..

هذا اكثر موضوع اتمنى اسمع اراءكم بيه لان صدق قابل للتعمق بعد اكثر وخصوصاً ان كل واحد بينا مر بتجربة مختلفة عن الثاني .